Kei te haere tonu ngā mahi a te toki ā-aituā. E tangi ana Te Taura Whiri i te Reo Māori, otirā, e tangi ana te ao i ngā mate o rangi tata nei. Ko te māreikura o Tūhoe, a Hema Temara tērā. Ko tō tātou pāpā ngākau aroha a Te Wharehuia Milroy tērā tae noa mai ki te Kōkā o ngā toi Māori a Waana Davis. Me he waipuke te rere o roimata, me he waihīrere te rere o ngā kōrero whakarangatira. Noho mai koutou ki te poho o Ranginui hei whetū tīahoaho ki te iwi Māori mō ake tonu atu. E kore e mutu te aroha.