Kāore e ārikarika ngā mihi ki ō tātou tūpuna, ki a Tāne Rore me Hine Rēhia hoki, nā rātou āna puipuiaki tongarerewa i waiho mai mā tātou te iwi Māori!

Nō mātou o Raukura Kapa Haka te māngaringari i whai wāhi atu ai mātou ki ngā kaupapa huhua i roto i ngā tau kua hori. Ko ētahi o ērā kaupapa whakaharahara, ko Tuku Iho i tū ki Hapani me New Zealand Week i tū ki Haina.

Mō te taha ki te kōwhiringa kaihaka, mārakerake te kitea i ngā ākonga, ōna pūkenga, tōna ngākaunui me ōna āheinga kapa haka. Waihoki, nā te waimaria o Raukura Kapa Haka, i puta toa whakaihu waka i ngā Whakataetae Kapa Haka mō Ngā Kura Tuarua o te motu i te tau 2016 me te tau 2018, he wheako ērā i āta poipoi i ngā ākonga i roto i ēnei tūāhuatanga. Nā reira, he māmā te kōwhiri i ētahi kaihaka o te kapa ki te tū hai kanohi mō tō tātou iwi, waihoki, mō tō mātou rohe o Te Arawa me ō mātou kura. Ko aua kura ko Raukura (Rotorua Boys’ High School) me Te Kura o Ngā Kōhine o Rotorua (Rotorua Girls High School). Ka mutu, ko ngā rangatira o te nāianei ēnei e whanake nei, e tupu nei i roto i te ao o kapa haka.

E rua ngā haerenga tā te kapa ki Hapani, ko te tuatahi i te marama o Paengawhāwhā ki Hokkaido, ā, ko te tuarua i te marama o Hereturikōkā ki Tōkiō. Ko Tuku Iho te ingoa o te kaupapa i tōtō ai i a mātou ki te whenua taurikura rā - tōna rerehua hoki. Nā, ko te uho o ā mātou mahi, ko te whakatairanga i te rerehua o te ahurea Māori mā te kapa haka, ki te ao katoa.

E mihi ana ki a Te Puia, New Zealand Māori Arts & Crafts Institute, Karl Johnstone (Tuku Iho Curator), Kiri Atkinson-Crean (General Manager Te Puia), James Rickard (NZMACI Master Carver) mō te āheinga mana nui nei mā ngā ākonga me Raukura Kapa Haka. Nā rātou ngā whakahaerenga katoa i whakarite, nā rātou te kapa i whakahaumaru mō te roanga o te haerenga, nā rātou au i whakakipakipa - tēnei au ka tuohu.

Ia mutunga tau, ko tā Raukura he whakakao i tētahi kāhui kapa haka, ā, ka kotahi atu ki Haina mō te kaupapa o New Zealand Week. Ko tā tērā kaupapa, he whakatairanga i ngā hua o Aotearoa ki a rātou o Haina, ā, ko tā mātou he taunaki mā te waiata me te haka, e kite ai rātou i te whirikoka o te ahurea Māori i konei i te kāinga.

I te mutunga iho, katoa ēnei kaupapa he mea e tautetia ai ā tātou rangatahi i roto i tōna ao Māori mā te kapa haka. Ko tāku e whakapono nui nei, kāore he otinga ki ngā hua ka puta i te kapa haka hai whai painga mā tātou katoa. Tēnei au ka mihi ake, ā, kāti au i konei!

Na,

Jamus Webster

(Tumuaki o Raukura Performing Arts Academy)

 

Tirohia ngā ataata o Te Kapa o Raukura
Te Kapa o Raukura He Whāriki i te Ahurea Māori ki Hapani (Ngā mihi ki te Rotorua Daily Post)

Tuku Iho - Te Kapa o Raukura ki Hapani