He aha Te Taura Whiri i te Reo Māori?

He mea whakatū Te Taura Whiri i te Reo Māori i raro i te Ture Reo Māori 1987, ā, ka haere tonu i raro i Te Ture Reo Māori 2016, ki te whakatairanga i te reo Māori hei reo ora, hei reo kōrero o ia rā, o ia rā.

He hinonga Karauna mana motuhake mātou. E noho haepapa ana mātou ki te Pāremata mō te whakamahinga o te tahua Tūmatanui ki te tautoko i ō mātou whāinga. Ia tau, ia tau ka tukuna mai e te Minita Whanaketanga Māori tāna Reta Whakatakoto Koronga.

Ka whakarite mātou i te Tauaki Whakamaunga Atu (SOI), he mahere whā tau te roa, ka whakarite hoki he mahere mō te kotahi tau e kīia ana ko Te Tauākī Koronga mō ngā Mahi kia Tutuki (SPE). Ka whakatakoto te SOI me te SPE ki mua ki te aroaro o te Pāremata, ka whakairihia hoki ki tā mātou paetukutuku. 

I te Pūrongo ā-Tau ka puta i ia tau ka whakatairitea ngā mahi i oti ki ngā kupu o te SOI, te SPE me te Reta Whakatakoto Koronga a te Minita.

Ā mātou mahi

• He kaiārahi matua i te aratakinga o te whakatinanatanga o te Maihi Karauna;
  
  
• He whakatairanga i te reo Māori ki Aotearoa whānui;
  
  
• He tautoko i te mahere rautaki reo me tōna arotakenga;
  
  
• He whakahaere, he hoko hoki i te rangahau;
  
  
• He whakamātautau, he rēhita hoki i ngā kaiwhakamāori ā-tuhi, ā-waha anō hoki;
  
  
• He whakamātautau i ngā taumata matatau;
  
  
• He whakawhanake i te reo e āhei ai te whakamahinga o te reo Māori i ngā āhuatanga katoa;
  
  
• He whakatakoto pūrongo ki te aroaro o te Minita Whanaketanga Māori e pā ana ki te reo Māori.

E oke ana Te Taura Whiri i te Reo Māori kia noho mai he uepū kaimahi matatau tonu ki te reo Māori, kia uaratia anō hoki ēnei tāngata e ō rātou rangatira i te rāngai tūmatanui me te rāngai tūmataiti

Ahurei ana tā matou tū hei māngai ā-motu mō te reo, ka mutu koirā anahe te kaupapa hei whakarangaranga mā mātou, i riro ai Te Taura Whiri i te Reo Māori hei tumu herenga mō ngā waka, mō ngā kaihoe whakaora reo, huri noa i te motu.

Ngā Aronga Matua

Ko ngā putanga hei āta tohu i ngā rerekētanga tautini ki te porihanga o Aotearoa e tautokona ana, e kōkiritia ana e mātou. E whā ēnei aronga matua, he tautoko tētahi i tētahi.

• He Kaha Te Whare o te Reo Mauriora

Te hāpai me te whakapūmau i te haere kōtui a te Karauna me te iwi Māori ki te whakaora ake i te reo Māori.

• He Kaha te mana o te reo Māori

Te whakapiki ake i te mana me te kaha kitea o te reo Māori kia kaha ake ai te kōrerotia o te reo Māori huri noa i Aotearoa

• He Kaha te Kete kōrero

Te whakaputa rauemi hou, te tiaki i ngā rauemi kua takoto kē me te whakawātea ake i ngā ara e tautokona atu ai te ako, te kōrero me te kounga o te reo Māori.

• He Kaha Te Taura Whiri i te Reo Māori

Te whakahaere i Te Taura Whiri i te Reo Māori i runga i te whaihua me te whakamoamoa, kia kairangi ai te tautoko i ngā mahi whakaora i te reo Māori.

Te Poari

Tokorima ngā mema o te poari, me tōna  tumuaki hei kaikawe rongo ki a rātou. Anei rā :

Nō te tī, nō te tā ngā kaiwhiri nei, e uru mai ai ngā whakaaro o ngā rohe, otirā o te motu whānui ki ngā whiriwhiringa take nui mō te reo.

Ā Mātou Mahi

Ko ā mātou mahi, me mea wehewehe ki ōna anō karangatanga. Koia ēnei:

TE AMO | Te Kaupapahere, ngā Ratonga Reo, te Rangahau, te Arotake

TE TOKO REO | Te Whakatairanga, te Whakawanaungatanga

TE HĀPAI Ō | Te Whakahaere