Hei whakanui i te tau tuatahi mai i te kōhurutanga o te rima tekau mā tahi tāngata i te whare karakia a Al Noor, i te Pokapū Ihirama o Linwood anō hoki i Ōtautahi, i whakamāori Te Taura Whiri i te Reo Māori i te whaikōrero a te mōrehu, te pouaru hoki, a Farid Ahmed i te Karakia Whakamaharatanga ā-motu (National Remembrance Service).

“E whakaputa ana mātou i te reo o te hunga i nui rawa atu te whakapāwera. I pāorooro te wairua o te kōrero a Mr Ahmed ki ngā whenua katoa huri noa i te ao. Ko te hao o te ngākau kia rangona ēnei kōrero i te reo rangatira anō hoki: nō mātou te hōnore,” hei tā Ngahiwi Apanui, tumuaki o Te Taura Whiri i te Reo Māori.”

“He aha te mea nui o te ao? He tangata. He tangata. He tangata.”

“Ko te aroha nui o te ngākau te tīmatanga o te maungārongo,” Farid Ahmed.

 

‘Ko te aroha nui o te ngākau te tīmatanga o te maungārongo’: te kupu a te mōrehu o te parekura i Ōtautahi

Ko te kōrero tēnei i te Hui Whakamaumahara ā-Motu a tētahi o ngā mōrehu o te parekura i Ōtautahi, a Farid Ahmed, i mate nei tōna hoa wahine i te 15 o Maehe. 

Ko te kupu a te Atua i te Kōrana ko tēnei, ”Kaua e kī kua mate te hunga i hinga i ngā mahi mō te Atua, i ngā karakia ki te Atua, me mōhio pū e ora ana rātou.  E ora ana ō rātou wairua.  Kāore nei e kitea ana e koe.”

E whakapono ana tātou ko te hunga i mate mō te kaupapa pai, ko te hunga i patua i a rātou e karakia ana, kua puta ki te rangi.  Ko te tinana kua hemo, engari anō te wairua.  Kei te rangi ō rātou wairua e tiakina ana e te Atua o te aroha.  E whakapono hoki ana mātou, ko te hunga ora i taotū, ko ngā whānau katoa e kūraruraru ana, ka manaakitia rātou e te Atua mō rātou e manawanui ana, ā, i te rā nei, i mua tonu i a tātou katoa, e tāpae atu ana aku karakia mō te hunga i patua, mō ngā mōrehu anō.  Ka taki karakia hoki ahau ki ngā iwi o Aotearoa, ki te whenua tonu o Aotearoa kia tau mai te maru o te manaakitanga ki runga i a tātou.  Ka mutu, ka taki karakia anō ahau ki ngā iwi o te ao kia tau mai te maungārongo me te whakaaro pai ki runga i a tātou.

Kei aku rangatira, tēnā koutou mō koutou i puta mai i te rā nei, e mihi ana.  Ka nui anō ngā mihi ki ngā kaiwhakarite o tēnei hui whakamaumaharatanga nui i whakaae mai kia whai wāhi ahau ki te kōrero.  Heoi, nei rā aku mihi ki ngā iwi o Aotearoa e piri tahi nei i runga i te whakaaro kotahi he whenua maungārongo a Aotearoa, āmine.

Ka pātai mai te tangata ki a au, “He aha i murua ai e koe te hara o te tangata nāna tō wahine i patu?”  He nui aku whakautu ki te pātai nā, engari nā te wā ka poto kē.  Tuatahi, he tangata whakapono ahau, e whakapono ana ahau ki te Atua, ā, ko tāna, ki te murua e tētahi ngā hara o tētahi, ka aroha mai ia ki a au, ka aroha mai ia ki a tātou.  Hei tā te Atua i te Kōrana tapu, “Ko te hunga whakamoe i te riri, muru i ngā hara, ka arohaina ko rātou e mahi pai ana e te Atua,” nā reira e muru ana ahau i ngā hara, he pērā te iwi Muhirama i te mea koinā te akoranga mai a te Kōrana, ki te murua ngā hara ka aroha te Atua ki a rātou.  Tuarua, ka whai au i te poropiti kotahi, pērā i ngā karere katoa a te Atua, ko tōna ingoa ko Mohameta, he tohu whakaaroha mō te ao katoa.  Ko tā te Atua, “E taku karere, kua tukuna koe e ahau hei whakaaroha mō te ao”, nā reira ki te kore he murunga hara, ki te kore hoki te whakaaroha, e kore nei e tūturu taku whakapono ki a ia.

Tuarua, kāore au i te hiahia kia mate au i te kino o te ngākau riri, i te nguha, kāore nei i hou mai te rongo.  Ko te whakamauāhara tonu tēnei.  He kaitangata tonu te rite.   Kāore au i te hiahia kia noho pēnei ahau, kia pēnei hoki te tangata.  Ko taku hiahia kia nui te aroha o te ngākau ki te whakaaroha atu, ki te muru hara, kia kore ai e mate anō he tangata.  Kia kaua rawa te mamae e kai nei i taku ngākau e kai i tangata kē atu.  Nā reira au i kī ai me hohou te rongo, me aroha, ā, kua murua ngā hara.

Kua kī mai anō te tangata ki a au he aha i aroha ai koe ki a ia anō nei ko tō taina tonu, ā, ka mea atu au, kua pānuitia mai e te imama te kupu i te Kōrana e mea ana, “E te iwi, kua hangaia koutou i te tokorua kotahi, i te tāne, i te wahine”, heoi ko Matua Arama rāua ko Whāea Ewe ēnei, ko tātou ā rāua tamariki, he whānau kotahi.  He tāina, he tuākana, he tungāne, he tuāhine tātou ki a tātou, ā-tangata nei.  Me pēhea e kino atu ai au ki taku taina? Kāore au i te whakaae ki tāna i mahi ai, kāore hoki au i te tautoko i tērā, he pōhēhē pea nōna ki tēnei āhuatanga, tērā pea i te raru ia i tōna tipuranga, i maukinotia rānei, tē taea e ia tōna raru te whakatau kia tika.  Kāore au i te whakaae ki tāna mahi, engari e kore hoki e taea e au a ia te whakakore hei taina nōku.  He taina, he tuakana, he tuahine ngā tāngata katoa ki a au.  Koinei te akoranga mai a te Atua.  Kāore au i te mauāhara ki a ia.  Kāore au i te mauāhara ki te tangata.

Kāti, anei aku whakaaro ki te ao.  Kei te whai katoa tātou i te maungārongo.  Koirā kē ā tātou kōrero.  Nā reira me tīmata ki hea?  Me tīmata ki a tātou anō.  Mātua whakapai i ō tātou ake ngākau, kia pupū ake te aroha hei hohou i te rongo.  Kei tēnā tangata, kei tēnā tangata te tikanga me pēhea, heoi me tīmata i ō tātou ngākau, kia huri ai ō tātou whakaaro.  Ka kīia ai, he whānau kotahi tātou, whakapono mai, hāhi mai, ahurea mai, reo mai.

Nā reira hei whakatepe ake, e mihi ana ki tōku tāone ātaahua.  Ko Ōtautahi tonu tēnei, te tāone māra, kei reira te putiputi e pua ana.  He akoranga kei roto i ngā putiputi nei.  Ahakoa he rerekē ngā momo putiputi, ka tipu tahi hei māra ātaahua, e tūtahi ana tētahi i tētahi i runga i te rongomau, ahakoa ngā rerekētanga.  Me pēnei kē tātou.  He tikanga āku, he tikanga kē āu.  He hāhi anō tōku, he hāhi kē tōu, engari nō te māra kotahi. 

Mā te Atua tātou e ārahi ki te maungārongo, ki te maruārongo, māna anō e hohou te rongo ki runga o Aotearoa, ki te ao whānui tonu.