Ko ia tangata i whai wāhi mai ki Te Wā Tuku Reo Māori i ahurei ai i tēnei tau, kua whakawhiwhia ki te tohu whakaihuwaka o Ngā Tohu Reo Māori 2020.  

“Koni atu i te kotahi miriona tāngata i hono mai i Te Wiki o te Reo Māori ki te whakanui ngātahi i te kaupapa nui rawa o te reo Māori. Ko rātou katoa tēnā kua whakawhiwhia ki te Tohu Reo Māori,” te kī a Ngahiwi Apanui, Tumu Whakahaere  o Te Taura Whiri i te Reo Māori.

“Kāore he hunga kei raro e putu ana, i te mahi ako me te kōrero i te reo Māori; i tēnei tau kei te whakanui ngātahi tātou i ngā toa reo Māori, neke atu i te kotahi miriona, puta noa i Aotearoa, i te ao anō hoki.”

“I tīni ō tātou tikanga e pai ai te takahi i te horopaki o te KOWHEORI-19; ā, i hurihia tērā mōrearea e Ngai Aotearoa whānui, hei whakanui ahurei ā-mariko.”

“He pae tawhiti tā mātou, kia kotahi miriona ngā tangata e taea ana te kōrero Māori i mua i te tau 2040: Kua whakaaturia mai e ngā toa o Ngā Tohu Reo Māori o te tau nei, ka taea taua pae tawhiti te whakamau kia tina.”

I tau atu ngā ringaringa waewae o Te Taura Whiri ki te kura tuatahi o Upper Hutt i te rangi nei, kia tuku atu tētahi rama Hei Tiki ki ngā tauira me ngā kaimahi i reira. Kua whakanuia i te wiki nei, ngā tangata me ngā whakahaere kua kaha taritari nei te tangata kia hono mai ki Te Wā Tuku Reo Māori. Ka whai tohu ngā tangata katoa i rēhita kia whai wāhi mai, hei ngā wiki tata nei.

Kua whakahoutia Ngā Tohu Reo Māori e Te Taura Whiri i te Reo Māori, nō reira, ahakoa rāhui mai, rāhui kore mai rānei i tēnei tau, ka whakakotahi tonu mai a Aotearoa tangata ki te whakanui i te reo Māori.

I whakatau hoki a Te Taura Whiri e kore ia e whakatū i ngā hui ā-tinana nunui i te tau 2020.  Nā reira ka whakakapihia ngā rangatū mō te reo me te hākari mō Ngā Tohu Reo Māori ki ētahi kaupapa ā-hangarau. 

Kia whakamihia a neherā, kia haumaru ai tātou i tēnei wā, hei whakatikatika hoki i tō tātou anga whakamua haere ake nei!

Kia kaha te reo Māori!

 

Hononga whaipānga:

Ngā Tohu Reo 2020