He tūranga mahi

Ko te whakarauoratanga o te reo Māori te manawa o ngā mahi a Te Taura Whiri i te Reo Māori. Ko tā mātou kaupapa matua ko te whakamana i te tūranga o te reo Māori hei reo ā-ture, ko te whakatairanga i te reo Māori hei reo kōrero mō ia rā, ko te ārahi hoki i te whakatinanatanga o Te Maihi Karauna (te Rautaki Reo Māori a Te Karauna). 

Kei te tukuna e mātou he wāhi e āhei ai te Rāngai Tūmatanui, te Rāngai Tūmataiti me ngā hapori whānui ki te whai tikanga, ki te ako, ki te kōrero anō hoki i te reo Māori. Ko tō mātou hiahia ka whakanui, ka rekareka anō hoki te iwi whānui o Aotearoa ki te reo Māori hei wāhanga mō tō tātou tuakiritanga ā-motu – ki ngā wāhi katoa, ki ngā ara katoa, ki ia rā anō hoki. 

He kōrero mō mātou

Ko te mahi a te Taura Whiri i te Reo Māori (Te Taura Whiri) he whakataunoa, he whakarauora hoki i te reo Māori. E whakaū ana mātou i te reo Māori hei reo whaimana. E whakatairanga ana mātou i te reo hei hanga māori noa ki te whakawhiti whakaaro, hei reo mauriora hoki mō ngāi Aotearoa katoa.

E hiahia ana Te Taura Whiri ki te hanga i ngā āhuatanga i Aotearoa e whakamānawa ai, e pārekareka ai hoki te reo Māori ki a ngāi Aotearoa katoa, kia noho ko te reo Māori hei wāhanga o tō tātou tuakiri ā-motu – arā, ko te reo ki ngā wāhi katoa, ki ngā huarahi katoa, i ngā rā katoa.

Whakapiri mai ki te rangaihi reo Māori, ā, kia whai wāhi mai ki te āpōpō e hiahia ana koe kia kite mō te reo Māori.

He kōrero mō te Tūranga

E kimi ana mātou i tētahi Kaitohutohu Rautaki Kōrero Mātāmua whai wheako kia uru mai ki tō mātou ohu Whakapāpātanga me ngā Mahi Whakatairanga - Te Toko Reo.

Ko Te Toko Reo te reo o te Taura Whiri - ko tā te ohu he ārahi, he whakatairanga, he tautoko, he waihanga, he whai wāhi hoki ki te huhua noa o ngā kaupapa. Tae atu rā tēnei ki ngā whakapāpātanga rautaki, te whakatū taiopenga matua, te hautū i ngā pūwhara tuihono tino pārekareka me te tūhonohono atu ki  ērā atu wāhanga o Te Whare o te Reo Mauriora.

Ko tā te Kaitohutohu Mātāmua he ārahi i ngā whakapāpātanga ā-roto, ā-waho hoki. E tau ana tēnei tūranga ki tētahi kua roa e takahi ana i tōna aramahi whakapāpātanga. Waihoki, he pūkenga whakapāpātanga tukupū ōna, he ngākau whakapuke hoki tōna ki te mahi i tētahi taiao kaupapa Māori.

E whakaratoa ana tēnei tūranga hei mahi wā uka mō te ono marama.

He Kōrero Mōu

Me whai wheako whitu tau koe e mahi ana i te rāngai whakapāpātanga, i ngā tūranga ōrite rānei.

He whaitake te kōrero me te tuhi hoki i te reo Māori - ehara i te mea me mātanga, me eke rānei ki te taumata matatau, engari, me eke koe ki tua atu i te taumata pia.

Ko tāu:

• he whai kia kairangi te kounga o ō mahi, waihoki, he whai kanohi hōmiromiro
• he noho māoriori noa ki te whakaoti i ngā whakapāpātanga kounga, tika hoki, ki ngā rā kati
• he whakarato rongoā atamai, waihoki, he whai ki te whakatutuki tika i te mahi i te wā tuatahi
• i ōna wā he whakawātea i a koe anō ki te mahi i tua atu i ngā haora mahi māori, ina koa rā i Te Wiki o te Reo Māori (Mahuru 2025).
• he whai ngākau reka ki te whai wāhi ki tētahi ohu e arotahi ana ki tētahi kaupapa hei whakatutuki mā te katoa
• He whakamahi i tō wheako hei tārai rongoā ki ā mātou whakapātari whakapāpātanga weriweri ake
• He whakaako, he whakaruruhau i ētahi atu

Ko tā mātou e whakarato nei

He taiao mahi kaupapa Māori tēnei. Waihoki, he wāhi haumaru tēnei ki te whakamahi, ki te whakawhānui ake hoki i tō reo Māori.

E noho pūmau ana mātou ki te waihanga i tētahi tari kanorau, kauawhiawhi anō hoki, nō reira, mehemea e hiamo ana tōu ngākau ki tēnei tūranga, engari, kāore ō wheako e hāngai ana ki ngā tohu katoa i te whakaaturanga tūranga mahi, e akiaki tonu ana mātou i a koe kia tono tonu mai.

Mai i te $95,000 - $125,000 te whānui o te utu ā-tau, kei te āhua tonu o te nui o tō wheako, tāpiri atu ko te Poua he Oranga, me te utu tāpui reo Māori e hāngai ana ki a Whakamātauria Tō Reo.

Kia whai wāhi koe ki tēnei tūranga, me āhei koe i raro i te ture ki te mahi ki Aotearoa nei

Ki te tono mō te tūranga nei, tēnā, haere ki tō mātou paetukutuku Kaitohutohu Rautaki Kōrero Mātāmua | Principal Communications Advisor - Wellington

Mō te roanga atu o ngā kōrero e pā ana ki te tūranga nei, tēnā, tuku īmēra mai ki tō mātou tīma ki [email protected]

Ka kati ngā tono ā te weherua pō, 4 Haratua 2025